Мадриднинг «Реал» клуби «Бавария» вингери Майкл Олисенинг эҳтимолий трансфери ҳақида расмий баёнот билан чиқди.

«Турли ОАВларда клубимиз “Бавария” футболчиси Майкл Олисега қизиқиш билдираётгани ҳақида тарқалган хабарларга муносабат сифатида “Реал Мадрид” шуни маълум қиладики, мазкур футболчи, унинг вакиллари ёки атрофидаги бирор шахс билан ҳеч қандай тўғридан-тўғри ёки билвосита алоқа ўрнатилмаган.

Шунингдек, “Реал Мадрид” ўзини “Бавария” билан узоқ йиллик ўзаро ҳурмат, ҳамкорлик ва ҳавасга асосланган ажойиб институционал муносабатлар боғлаб туришини таъкидлайди ҳамда ҳақиқатга тўғри келмайдиган тахминлар тарқатилаётганидан афсусланади.

Икки клуб ўртасидаги муносабатлар доимо ишонч ва ўзаро ҳурмат тамойилларига асосланган бўлиб келган. Бу, жумладан, бошқа клубга тегишли футболчига қизиқиш билдирилган тақдирда, масала аввало клублар ўртасида ҳал қилиниши лозимлиги ҳақидаги умумий қарашда ҳам намоён бўлади. Бу тамойиллар тарихан “Бавария” ва “Реал” ўртасидаги муносабатларни тартибга солиб келган», — дейилади мадридликлар баёнотида.

Аввалроқ хорижий нашрлар «Реал» жаҳон чемпионатидан кейин Майкл Оилисе трансфери бўйича «Бавария»га расмий таклиф юборишни режалаштираётгани ҳақида хабар тарқатган эди.

Transfermarkt портали маълумотларига кўра, футболчининг бозор қиймати 150 миллион еврога баҳоланмоқда.