«Тоттенхэм» клуби ҳимоячиси Микки ван де Вен фаолиятини бошқа жамоада давом эттириши мумкин. Бу ҳақда Нидерландиянинг машҳур De Telegraaf нашри хабар тарқатмоқда.
Айни дамда футболчига иккита гранд клуб даъвогарлик қилмоқда. Ван де Венни ўз сафига қўшиб олиш учун «Ливерпуль» ва «Барселона» жамоалари жиддий кураш бошлашган. «Тоттенхэм» раҳбарияти эса футболчини қўйиб юборишни истамаяпти, бироқ «шпорлар» учун нидерландиялик ҳимоячи билан амалдаги шартномани узайтириш анча қийин кечиши тахмин қилинмоқда.
Ҳозирги вақтда Микки ван де Вен Нидерландия терма жамоаси сафида ЖЧ-2026 мусобақасида иштирок этмоқда. Эслатиб ўтамиз, илк турда нидерландияликлар Япония терма жамоаси билан дуранг ўйнашган эди (2:2).
