«Манчестер Сити» ярим ҳимоячиси Родри билан янги шартнома бўйича музокараларни давом эттирмоқда, аммо томонлар ҳозирча келишувга яқин эмас. Клуб май ойида ўз таклифини берган, бироқ эҳтимолий битим шартлари ошкор қилинмаган.

Таниқли инсайдер Фабрицио Романонинг маълум қилишича, музокаралар давом этаётган бўлса-да, ҳозирча сезиларли тафовут сақланиб қолмоқда.

«Музокаралар кетмоқда, аммо айни пайтда томонлар келишувдан анча узоқ. Вақт етарли — шартнома тугашига яна бир йил бор. Бироқ Родрига таклиф қилинаётган янги шартнома шартлари қандай экани ҳозирча номаълум. Бу томонлар ўртасида ҳали ҳам катта фарқ борлигини англатади. Албатта, молиявий шартлар ва шахсий омиллар ҳам вазиятга таъсир қилиши мумкин.

Родрининг келажаги ҳақида гап кетганда, бу масала айнан шу ёзда ҳал бўлишига ҳеч қандай кафолат йўқ. У яна бир мавсум «Манчестер Сити»да қолиб, 2027 йилда клубни эркин агент сифатида тарк этиши ҳам мумкин. Бу ҳам ҳисобга олиниши керак бўлган вариантлардан бири», — деди Романо ўзининг YouTube каналида.

Родрининг «Манчестер Сити» билан амалдаги шартномаси 2027 йилнинг ёзигача мўлжалланган. 29 ёшли испаниялик футболчи 2019 йил ёзида "Атлетико" клубидан 70 миллион евро эвазига «шаҳарликлар» сафига қўшилган.

Ўтган мавсумда Родри барча мусобақалар доирасида 37 та учрашувда майдонга тушиб, 2 та гол урди ва 1 та голли узатмани амалга оширди.

Айни вақтда у Испания терма жамоаси сафида ЖЧ-2026 мусобақасида иштирок этмоқда. Испания биринчи турда Кабо-Верде билан 0:0 ҳисобида дуранг ўйнаган бўлса, иккинчи турда 21 июнь куни Саудия Арабистонига қарши баҳс олиб боради.