Лондоннинг «Челси» клуби ёзги трансфер ойнасида ҳимоячи Мало Гюстони сотишга тайёр. Бу ҳақда журналист Саймон Филлипс хабар бермоқда.

Қайд этилишича, агар «Челси» муносиб таклиф олса, 23 ёшли футболчини қўйиб юборади. Ўнг қанот ҳимоячисининг агенти «Манчестер Сити» ва «Интер» вакиллари билан аллақачон музокаралар ўтказган, чунки ушбу клубларнинг французга бўлган қизиқиши ортиб бормоқда.

Якунланган клуб мавсумида Гюсто барча турнирларда 49 та учрашувда иштирок этиб, рақиблар дарвозасини 3 бор ишғол этди ва 5 та голли узатмага муаллифлик қилди.

Transfermarkt портали маълумотларига кўра, ҳимоячининг бозор қиймати 35 миллион еврони ташкил қилади.