Англия терма жамоаси ва «Арсенал» ярим ҳимоячиси Деклан Райс ўйинларнинг тиғиз тақвими ҳақида фикр билдирди.
27 ёшли футболчи ЖЧ-2026 даги илк ўйинида «уч шерлар» Хорватияни мағлуб этган (4:2) баҳснинг иккинчи бўлимида захирага олинганди. Ярим ҳимоячи майдонни жароҳат гумони билан тарк этган бўлса-да, жиддий муаммолардан қутулиб қолди.
«Биз жуда кўп, ҳатто меъёридан ортиқча ўйин ўтказяпмиз. Жадвал ақл бовар қилмас даражада тиғиз, лекин нима ҳам қила оламиз? Шунчаки ўтириб, нолиш керак эмас. Премьер-лигадаги яқинда қўлга киритган ғалабамиз каби дамлар учун ҳаракатни давом эттириш зарур», – дея Райснинг сўзларини келтиради Telegraph.
23 июнь куни инглизлар ЖЧ-2026 гуруҳ босқичининг иккинчи тури доирасида Ганага қарши майдонга тушади.
