Мадриднинг «Реал» клуби янги бош мураббийи Жозе Моуриньо жамоа учун устувор тактик схемани танлади.

Португалиялик мутахассис бўлажак мавсумда 4-2-3-1 формациясига урғу бермоқчи, дея хабар бермоқда «The Athletic». Бундай жойлашувда ҳужум учидан Килиан Мбаппе жой олади, Винисиус Жуниор эса, ўз навбатида, ўзи учун одатий бўлган чап қанот вингери позициясида ҳаракат қилиши мумкин бўлади.

Ўтган мавсумда «қаймоқранглилар» турли формацияларга мурожаат қилишди, аммо энг кўп Мбаппе ва Винисиус олдинда бўлган 4-4-2 кўринишларидан фойдаланилди.

Моуриньонинг тайинлангани ҳақида июнь ойи бошида эълон қилинган эди. Мутахассис 2029 йилнинг ёзига қадар мўлжалланган шартномага имзо чеккан.