Ганалик машҳур шаман Нана Кваку Бонсам Англия терма жамоаси ҳужумчиси ва сардори Харри Кейннинг устига қўйилган лаънатни олиб ташлаганини маълум қилди.
«Харри Кейнни кейинги ўйинда гол ура олиши учун озод қиламан. Харри, хафа бўлиш йўқ», — деб ёзди Бонсам ўзининг ижтимоий тармоқдаги саҳифасида.
Эслатиб ўтамиз, Англия — Гана учрашувидан бир неча кун олдин ушбу шаман Кейнга қарши дуо ўқиб, уни лаънатлашини эълон қилган эди. Натижада, тасодифни қарангки, сешанба кунги баҳсда Кейн бир неча метрлик масофадан Гана дарвозасини ишғол эта олмай, жуда қулай имкониятни қўлдан бой берди.
ЖЧ-2026 гуруҳ босқичининг 2-туридан сўнг Англия ва Гана терма жамоалари 4 тадан очко жамғарган ҳолда «L» квартетида пешқадамлик қилишмоқда.
Учинчи турда Гана терма жамоасига Хорватия рақиблик қилади. Айни дамда «шахматчилар» 3 очко билан учинчи ўринда боришмоқда.
