Туркиянинг «Фенербахче» клуби «Марсель» ҳужумчиси Мэйсон Гринвуд трансфери устида фаол иш олиб бормоқда. Бу ҳақда нуфузли L'Équipe нашри хабар тарқатди.

Истанбул клуби раҳбарияти 24 ёшли инглиз футболчиси ва унинг вакиллари билан шахсий шартнома шартлари бўйича тўлиқ келишувга эришган. «Фенербахче» футболчига молиявий жиҳатдан жуда манфаатли таклиф тайёрлаган ва уни жорий ёзги трансфер ойнасидаги асосий мақсадларидан бири сифатида кўрмоқда.

Бироқ Франциянинг «Марсель» клуби билан музокаралар анча мураккаб тус олган. Туркия томони ҳужумчи учун 30 миллион евро ва бонуслар тўлашга тайёр. Французлар эса ўз юлдузини 50–55 миллион еврога баҳоламоқда ва нархни тушириш ниятида эмас.

Қайд этиш жоизки, Мэйсон Гринвудга бўлган қизиқиш фақатгина Туркия клуби билан чекланиб қолмаяпти. Футболчининг атрофидаги вазиятни Мадриднинг «Атлетико», Саудия Арабистонининг «Ал-Ҳилол» ҳамда Италиянинг «Рома» клублари ҳам диққат билан кузатиб бормоқда.