Мадриднинг «Реал» клуби ярим ҳимоячиси Орельен Тчуамени шу ёзда жамоасини ўзгартириши мумкин.
Indykaila News нашрининг тарқатган хабарига кўра, франциялик футболчини ўз сафига қўшиб олишга Англиянинг «Манчестер Юнайтед» клуби жиддий қизиқиш билдирмоқда. 23 июнь куни «қизил иблислар» вакиллари Лондонда футболчининг агентлари билан учрашув ўтказишган. Томонлар ярим ҳимоячининг эҳтимолий трансфери шартларини муҳокама қилишган.
Маълумот учун, Орельен Тчуамени 2022 йили 80 миллион евро эвазига «Монако»дан «Реал»га кўчиб ўтган эди. Унинг «қаймоқранглилар» билан амалдаги шартномаси 2028 йилнинг 30 июнига қадар мўлжалланган. Франциялик футболчи якунланган 2025/26 йилги мавсумда мадридликлар сафида барча мусобақаларда жами 49 та учрашувда майдонга тушиб, ўз ҳисобига 2 та гол ва 2 та голли узатмани ёздириб қўйган.
