ФИФА Клублар ўртасидаги Жаҳон чемпионати иштирокчилари сонини 32 тадан 48 тагача кенгайтиришга яқин турибди. Бу ўзгариш 2029 йилда бўлиб ўтадиган навбатдаги турнирдаёқ кучга кириши мумкин. Британиянинг The Guardian нашри хабар беришича, бунга ФИФА ва Европа клублари бирлашмаси (EFC) ўртасидаги янги келишув замин яратмоқда.
Манбанинг маълум қилишича, томонлар турнирни ташкил этиш ва унинг тижорий ривожланиши билан шуғулланувчи қўшма корхона тузишга келишиб олганлар. Ушбу ҳамкорлик мусобақани кенгайтириш жараёнини тезлаштириши кутилмоқда.
2025 йилги турнирда Европа шарафини 12 та клуб ҳимоя қилган эди, бироқ "Ливерпуль", "Барселона" ва "Наполи" каби грандлар мусобақадан четда қолишди. Амалдаги саралаш тизимига кўра, турнирда Чемпионлар лигасининг сўнгги ғолиблари ва УЕФА рейтингида энг юқори ўринни эгаллаган клублар иштирок этиши белгиланган бўлиб, битта мамлакатдан фақат иккита жамоа қатнашишига чеклов қўйилган эди.
EFC ушбу лимитни бекор қилишга эришмоқчи. Агар бу ўзгаришлар қабул қилинса, инглиз клублари қўшимча ўринларга эга бўлиши мумкин, чунки "Арсенал", "Ливерпуль" ва "Манчестер Сити" клублари УЕФА рейтингининг кучли саккизталигидан жой олган.
Ташкилотдагиларнинг фикрича, европалик иштирокчилар сонининг кўпайиши турнирнинг тижорий жозибадорлигини янада оширади.
