Ярим ҳимоячи Нико Пас Миланнинг "Интер" клуби қизиқишлари доирасида бўлиб турибди. Бу ҳақда инсайдер Жанлука ди Марцио хабар бермоқда.
Манбанинг берган маълумотларига кўра, хавбек шу ёзда "Комо"дан Мадриднинг "Реал" клубига қайтиши мумкин. "Қироллик клуби" футболчини қайта сотиб олиш ҳуқуқига эга. Шундан сўнг, "нерадзурри"лар "қаймоқранглилар" билан Паснинг трансфери бўйича келишиб олишга ҳаракат қилиб кўришади. Аргентиналик футболчининг ўзи ҳам Италия А Сериясида қолишга қарши эмас.
Италия чемпионатининг якунланган мавсумида 21 ёшли хавбек 35 та учрашувда майдонга тушиб, 12 та гол урди ва олтита голли узатмани амалга оширди. Шунингдек, у бешта сариқ карточка олди.













