"Интер Майами" ҳужумчиси Луис Суареснинг фикрига кўра, Хулиан Альварес "Барселона" учун жуда мос номзод ҳисобланади.

Мадриднинг "Атлетико" клубида тўп сураётган аргентиналик форвард "кўк-анорранглилар"нинг трансфер бозоридаги бош мақсади бўлиб турибди. Футболчининг ўзи ҳам каталонияликлар сафига қўшилишни истамоқда, бироқ "матрасчилар" ўз юлдузини сотишни хоҳлашмаяпти.

"Альварес тўпни жуда яхши назорат қилади, майдонда ажойиб ҳаракатланади — у "Барселона"га жуда тез мослашиб кетган бўларди. Унда Фликнинг ўйин услубига мослашиш учун барча зарур фазилатлар бор, аммо бу трансферни амалга ошириш осон бўлмайди, чунки Хулиан аллақачон топ-клубда ўйнаяпти", — дея фаолияти давомида ҳам "Барса"да, ҳам "Атлетико"да тўп сурган Суареснинг сўзларини келтиради Испания ОАВлари.

Миш-мишларга кўра, "Барселона" 26 ёшли футболчи учун тахминан 150 миллион евро таклиф қилиши мумкин.