«Ливерпуль» ярим ҳимоячиси Кёртис Жонс «Ноттингем Форест»нинг қизиқишлар доирасига кирди. Мерсисайд клуби раҳбарияти Витор Перейра жамоасидан бўлаётган изчил қизиқишдан хабардор. «Ноттингем» Эллиот Андерсонни «Манчестер Сити»га сотганидан сўнг майдон марказини кучайтириш учун номзод қидирмоқда, дея хабар беради журналист Бен Жейкобс ўзининг Х ижтимоий тармоғидаги саҳифасида.

Аввалроқ Жонснинг трансфери бўйича Миланнинг «Интер» клуби таклиф билан чиққан эди, бироқ уларнинг 21,5 миллион фунтлик (24,9 миллион евро) сўрови рад этилган. «Ливерпуль» футболчини 40 миллион фунтга (46,4 миллион евро) баҳоламоқда. Агар сўралган маблағ таклиф қилинмаса, клуб ярим ҳимоячини ўз таркибида сақлаб қолади.

Жонснинг амалдаги шартномаси 2027 йилнинг ёзига қадар мўлжалланган. Шунингдек, «Ноттингем Форест» муқобил вариант сифатида ўз раҳбариятидан трансферини сўраган «Тоттенхэм» хавбеки Лукас Бергвалль номзодини ҳам кўриб чиқмоқда.