Лондоннинг «Арсенал» клуби ҳужумчиси Виктор Дьёкереш жамоани тарк этиши мумкинлиги ҳақидаги миш-мишларга изоҳ берди.
Швециялик футболчининг номи Мадриднинг «Атлетико» клуби билан боғланаётган эди. Бу ҳақдаги саволга жавоб берар экан, 28 ёшли ҳужумчи фаолиятида ўзгариш қилиш ҳақида ўйламаётганини маълум қилди.
«Бошқа клублар менга қизиқиш билдираётганини кўриш ёқимли, албатта, лекин мен «Арсенал»да ўзимни жуда қулай ҳис қиляпман. Биринчи мавсумдан кейин менда фақат ижобий таассуротлар қолди. Турли миш-мишлар ҳақида бош қотирмаяпман. Олдинда мени терма жамоа сафидаги муҳим ўйин кутмоқда — айни дамда бор эътиборимни шунга қаратганман», — дея Дьёкерешнинг сўзларини келтиради Arsenal Radar.
Эслатиб ўтамиз, 1 июль куни Тошкент вақти билан 02:00 да ЖЧ-2026 нинг 1/16 финали доирасида Швеция ва Франция терма жамоалари ўртасидаги учрашув бўлиб ўтади.
