Миллатлар лигаси гуруҳ босқичидан ўрин олган Ирландия ва Исроил терма жамоалари ўртасидаги учрашув Сербияда бўлиб ўтади. Баҳс 4 октябрь куни Бачка-Топола шаҳрида ўтказилади.
Ирландия футбол ассоциацияси матбуот хизматининг хабар беришича, мазкур ўйин стадионга томошабинлар киритилмаган ҳолда ташкил этилади.
Эслатиб ўтамиз, учрашув жойининг ўзгартирилишига ирландларнинг хавфсизлик нуқтаи назаридан ҳамда мамлакатдаги радикаллашган аҳоли кайфиятини инобатга олиб, УЕФАга қилган мурожаати сабаб бўлган.
Жавоб учрашуви ҳам нейтрал майдонда — Венгриянинг Дебрецен шаҳрида бўлиб ўтади. Ирландия томони Фаластин можаросини важ қилиб кўрсатган ҳолда, Исроилни мусобақалардан четлатишни талаб қилган эди.
Ўз навбатида, ФИФА халқаро ҳуқуқ нуқтаи назаридан ҳудуд мақомининг ноаниқлигини важ қилиб, Иордан дарёсининг Ғарбий соҳилидаги Исроил клубларини четлатмаслик ҳақида қарор чиқарган.
