Нидерландия терма жамоаси устози Рональд Куман ЖЧ-2026нинг 1/16 финали доирасида Марокаш жамоасига қарши кечган ва бой берилган 11 метрлик пенальтилар серияси ҳақида ўз фикрларини билдирди.
«Марокашликларнинг иккинчи зарбаси жуда муҳим эди. У ҳар икки жамоага ҳам таъсир қилди. Дарвозабонимиз зарбани қайтарди, бироқ кейин тўпни ўз дарвозасига киритиб юборди. Бундай вазиятлар сизга қарши ишлаганида, ҳаммаси тугаган бўлади. Бештадан учта 11 метрлик зарбани голга айлантира олмаслик — бу қабул қилиб бўлмас ҳолат», — дея мутахассиснинг сўзларини келтиради Vi.nl.
Эслатиб ўтамиз, Нидерландия ва Марокаш ўртасидаги баҳснинг асосий ва қўшимча вақтлари 1:1 ҳисобидаги дуранг билан якунланди. Пенальтилар сериясида эса «тўқ сариқлар» 2:3 ҳисобида имкониятни бой бериб, мундиални тарк этишди.
