«Барселона» клуби марказий ҳимоячиси Андреас Кристенсен жамоа билан янги меҳнат шартномасига имзо чекди. Бу ҳақда «кўк-анорранглилар» матбуот хизмати расман маълум қилди.

30 ёшли даниялик футболчининг клуб билан аввалги келишуви шу йилнинг июнь ойи якунида тугаган эди. Янги шартнома эса 2028 йилнинг ёзига қадар мўлжалланган.

Маълумот учун, Андреас Кристенсен 2022 йилдан буён «Барселона» шарафини ҳимоя қилиб келмоқда. Якунланган мавсумда у жароҳатлари сабабли барча мусобақаларда бор-йўғи 18 та учрашувда майдонга тушиб, ўз ҳисобига битта гол ёздириб қўйди. Умумий ҳисобда эса тажрибали ҳимоячи каталонияликлар либосида 98 та баҳсда қатнашиб, 5 та гол ва 3 та ассист муаллифига айланган.