«Пари Сен-Жермен» ва «Ювентус» ҳозирча ҳужумчи Рандаль Коло-Муанининг трансфер шартлари бўйича бир қарорга келгани йўқ.
«Кекса синьора» 27 ёшли футболчининг ўзи билан аллақачон келишиб олган — томонлар беш йиллик шартнома борасида оғзаки розиликка эришган. Tuttosport нашрининг хабарига кўра, «Ювентус» «ПСЖ»га Чемпионлар Лигасига йўлланма қўлга киритилган тақдирда 36-37 миллион евро эвазига мажбурий сотиб олиш шарти билан ижара вариантини таклиф қилмоқда. Бироқ парижликлар ўз сўзида туриб турибди — улар 40 миллион евро талаб қилишмоқда. Катта эҳтимол билан, клублар барибир ўзаро муросага келишади.
Рандаль Коло-Муани 2024/25 йилги мавсумнинг иккинчи ярмида ҳам туринликлар сафида тўп сурган эди. Ўтган мавсумни эса франциялик футболчи ижара асосида «Тоттенхэм»да ўтказди ва у ерда ўзини у қадар ёрқин кўрсата олмади.
