Швеция терма жамоаси бош мураббийи Грэм Поттер унинг жамоаси ЖЧ-2026 1/16 финалида Франция терма жамоасига (0:3) қаршилик кўрсата олмаганини тан олди.

«Энг яхши жамоа ғалаба қозонди, Францияни табриклайман. Менимча, ўйин борасида биз идеал ҳаракат қилишимиз керак эди ва агар шундай ўйнаганимизда ҳам, ростини айтсам, бу етарли бўлармиди, ишончим комил эмас, чунки рақиб жуда юқори даражада эди.

Менинг футболчиларга ҳеч қандай эътирозим йўқ. Ўйиндан кейин уларга Франциядан учралган мағлубиятни шармандалик деб ҳисобламаслигимни айтдим, улар – энг яхши жамоа ва уларда бир нечта юқори савияли футболчилар бор.

Агар Франция жамоасининг фаолияти ва натижаларига назар ташлаб, уларни бизники билан солиштирсак, биз ёш, ривожланаётган жамоамиз, умид қиламанки, олдинда бизни кўплаб яхши кунлар кутмоқда.

Менимча, бизда ажойиб турнир бўлди, у бизга ўсиш ва ўрганишга ёрдам берди. Нидерландиядан учралган мағлубиятдан (1:5) кейин ўзига келиш, шунингдек, Япония билан ўйинда (1:1) керакли очкони қўлга киритиш футболчилар учун фантастик натижа бўлди. Биз бундан хулоса чиқариб, олдинга интилишимиз керак.

Жаҳон чемпионатида бизда ўндан ортиқ дебютант бор, бу Франция жамоасидан сезиларли фарқ қилади. Шундай экан, бу орқали албатта янада яхшироқ бўламиз. Бизда тажриба бор, ғалаба қозонамиз, мағлуб бўламиз, жамоа ва шахс сифатида ўсамиз. Менимча, бугунги ўйинга айнан шундай қарашимиз керак», – деди Поттер.