Мексика терма жамоаси ЖЧ-2026 1/16 финал учрашувида Эквадорни мағлуб этди (2:0).

Шу тариқа, мексикаликлар турнирдаги 4 та ўйинда 4 та ғалабага эришиб, ўз дарвозаларидан бирорта ҳам тўп ўтказиб юборишмади. Гуруҳ босқичида жамоа ЖАР (2:0), Жанубий Корея (1:0) ва Чехия (3:0) терма жамоаларини мағлуб этган эди. Ушбу ўйинларнинг барчаси Мексикада бўлиб ўтди.

Бундан аввал ЖЧ тарихида фақатгина 2 та жамоа турнирни кетма-кет 4 та қуруқ ғалаба билан бошлай олган. Бу натижага 1986 йилда Бразилия ва 1990 йилда Италия терма жамоалари эришишган.

Қизиғи шундаки, ушбу жамоаларнинг иккаласига ҳам ўша Жаҳон чемпионатларида ғолиб чиқиш насиб этмаган. Бразилияликлар 1/4 финалда Францияга пенальтилар сериясида имкониятни бой бериб, мусобақани тарк этишган. Италия эса ўз уйида ўтган ЖЧдаги қуруқ ғалабалар сериясини 5 та ўйинга етказган, бироқ 1/2 финалда Аргентинага яна ўша пенальтилар сериясида ютқазиб қўйган.

Мексика терма жамоаси 1/8 финалда Англия — Конго ДР учрашуви ғолиби билан тўқнаш келади.