«Ливерпуль» клубига яқиндагина келиб қўшилган марказий ҳимоячи Жереми Жаке ўзининг соғлиғи борасидаги фикрлари билан ўртоқлашди.
Эслатиб ўтамиз, март ойининг бошида 20 ёшли франциялик футболчи «Ренн» сафида тўп сураётган вақтида елкасидан жароҳат олган эди.
«Ўзимни анча яхши ҳис қиляпман ва мавсум олди тайёргарлик бошланишига 100 фоиз тайёр бўламан, чунки мен белгиланган графикдан бироз олдинда кетмоқдаман. Агар меҳнат қилишда давом этсам, мавсум бошланишига жуда яхши спорт формасида бўламан», — дея Жакенинг сўзларидан иқтибос келтирмоқда «қизиллар» матбуот хизмати.
Франциялик футболчи мерсисайдликлар сафида Англия Премьер-лигасида 23 август куни дебют қилиши мумкин. Ички чемпионат янги мавсумининг биринчи тури доирасида «Ливерпуль» «Ньюкасл»га қарши майдонга тушади.
