Яқинда Лондоннинг «Челси» клуби матбуот хизмати 21 ёшли ҳимоячи Марко Палестра билан шартнома имзоланганини эълон қилган эди. Етти йиллик меҳнат битимига имзо чеккан италиялик футболчи Англия Премьер-лигасига кўчиб ўтгани ҳақида ўз фикрларини билдирди.

«Дунёнинг энг яхши клубларидан бири бўлмиш «Челси»га ўтишимга кўплаб омиллар сабаб бўлди. Иш бошлаётганимдан жуда ҳам хурсандман. Машғулотларга киришишни, барча мухлисларни, жамоадошларимни ва мураббийни кўришни интиқлик билан кутяпман. Бу ерда жуда кўплаб иқтидорли футболчилар бор, таркиб жуда кучли ва Хаби Алонсодек мураббий ишламоқда», — дея футболчининг сўзларидан иқтибос келтирмоқда клуб матбуот хизмати.

Италиялик ҳимоячининг сўзларига кўра, у «кўклар» устози билан аллақачон гаплашиб олган. Алонсо унга «Челси»нинг бўлажак мавсумдаги ўйини борасидаги ўз қарашларини тушунтирган.

Палестра «Аталанта» клуби тарбияланувчиси ҳисобланади. У «Челси»га ўтгунга қадар бергамаликлар таркибига тегишли эди. Ўтган мавсумда эса ҳимоячи «Кальяри» клубида ижара асосида тўп сурган.