Нидерландиянинг «Аякс» клуби расмий сайтида маълум қилишича, Луи ван Гал Амстердам клуби кузатув кенгаши маслаҳатчиси лавозимини тарк этди. Мутахассис ўз қарори ҳақида клуб раҳбариятини хабардор қилган.
Ван Гал 2023 йил октябрь ойидан буён футбол масалалари бўйича ташқи маслаҳатчи сифатида фаолият юритиб келаётган эди. У клубдаги қатор кадрлар ўзгаришидан сўнг муҳим лавозимларни шакллантиришда ёрдам бериш учун таклиф қилинган.
«Михаэль ван Праг менинг дўстим ва биз илгари ҳам бирга самарали ишлаганмиз. У кузатув кенгаши раиси сифатида 2023 йилда менга мурожаат қилди ва мен унга ҳам, «Аякс»га ҳам ёрдам беришдан мамнун бўлдим. Ўша пайтда муҳим лавозимларда кўплаб ўзгаришлар бўлган, клубда футболга оид тажриба етишмаётган эди. Ташқи маслаҳатчи сифатида Алекс Крос ва Марейн Бёкернинг тайинланишида ўз ҳиссамни қўшдим.
Аммо Михаэль 2025 йилда кетди, кейин Алекс клубни тарк этди, энди эса Марейн ҳам кетди. Мен учун ҳам кетиш вақти келди», — деди ван Гал.
«Аякс» кузатув кенгаши ван Галнинг қарори сабаб афсусда эканини билдирган бўлса-да, уни тушунишини таъкидлади ва клуб ривожига қўшган ҳиссаси учун мутахассисга миннатдорлик билдирди.













