«Брайтон» клуби ҳимоячи Жоэль Велтманнинг жамоадан кетганини расман эълон қилди. 34 ёшли нидерландиялик футболчи шартнома муддати якунланганидан сўнг клубни тарк этди.

Велтман Англия клубига 2020 йилнинг ёзида «Аякс»дан кўчиб ўтган эди. У 6 мавсум давомида барча мусобақаларда жами 191 та ўйинда майдонга тушиб, 5 та гол уришга муваффақ бўлди. Футболчи «чайкалар»га АПЛда тўрт бор кучли ўнталикдан жой олишига ҳамда 2022/2023 йилги мавсум якунларига кўра Европа Лигасида дебют қилишига ёрдам берди.

Асосий жамоадаги иштирокидан ташқари, Велтман 2022 йилдан буён «Брайтон»нинг хайрия фонди элчиси ҳисобланарди ва клубнинг ижтимоий лойиҳаларида бир неча бор фаол қатнашган. Шунингдек, футболчи Нидерландия миллий терма жамоаси сафида 28 та ўйин ўтказиб, 2 та гол урган ва терма жамоа билан ЖЧ-2014 бронза медали соҳибига айланган.