«Милан» клуби қанот ҳужумчиси Рафаэл Леау Лондоннинг «Тоттенхэм» клубига таклиф қилинди. Бу ҳақда La Gazzetta dello Sport нашри хабар бермоқда.

Манбанинг таъкидлашича, «шпорлар»га Леауни тахминан 60-70 миллион евро эвазига сотиб олиш имконияти чиққан. Қайд этилишича, аввалроқ Туркиянинг «Галатасарой» ва «Фенербахче» клублари португалиялик футболчини ўз сафига қўшиб олишга уриниб кўришган, бироқ футболчининг ўзи бу таклифларга рад жавобини берган.

Бундан олдин Леаунинг ўзи ҳам шу ёзги трансфер ойнасида клубини ўзгартириш, яъни бошқа жамоага ўтиш нияти борлигини маълум қилган эди.

2025/26 йилги мавсумда Леау барча мусобақаларни инобатга олган ҳолда 31 та ўйинда майдонга тушиб, 10 та гол урди ва 3 та голли узатма муаллифига айланди.

27 ёшли вингернинг «Милан» клуби билан айни дамдаги амалдаги меҳнат шартномаси 2028 йилнинг ўрталарига қадар мўлжалланган.