Туркия миллий терма жамоаси бош мураббийи Винченцо Монтелла ўз лавозимида қолади. Бу ҳақда таниқли инсайдер Николо Скира хабар бермоқда.

Манба берган маълумотларга кўра, Туркия футбол федерацияси Жаҳон чемпионати — 2026даги омадсиз иштирокка қарамай, италиялик мутахассисни жамоа бошқарувида қолдиришга қатъий қарор қилган. Туркия терма жамоаси мундиалнинг гуруҳ босқичида бор-йўғи 3 очко жамғариб, кейинги босқичга чиқа олмаган эди.

52 ёшли Монтелла 2023 йилдан буён Туркия терма жамоасини бошқариб келмоқда. Унинг қўл остида жамоа 36 та учрашув ўтказиб, 21 та ғалабага эришди, 5 марта дуранг ўйнади ва 10 та баҳсда имкониятни бой берди.

Монтелланинг айни дамдаги амалдаги шартномаси 2028 йилнинг июль ойи охиригача, яъни навбатдаги Европа чемпионати якунига қадар мўлжалланган.