Мадриднинг «Реал» клуби ўз таркибида ҳужумчи Винисиус Жуниорни сақлаб қолиш ниятида.

Marca нашрининг тарқатган маълумотларига кўра, мадридликлар бразилиялик юлдуз билан амалдаги шартномани узайтириш бўйича музокараларни Жаҳон чемпионати якунланганидан кейин қайта бошлайди. Гарчи футболчининг ўзи ҳам, «қаймоқранглилар» раҳбарияти ҳам бир неча бор ҳамкорликни давом эттириш истагини билдирган бўлишса-да, амалда бу борадаги музокаралар охирги бир йил давомида тўхтаб қолган эди.

Винисиус Жуниор 2018 йилда «Фламенго» клубидан 45 миллион евро эвазига «Реал»га ўтган эди. Унинг мадридликлар билан ҳозирги шартномаси 2027 йилнинг 30 июнига қадар мўлжалланган. Ортда қолган 2025/26 йилги мавсумда ҳужумчи «қаймоқранглилар» сафида барча мусобақаларда 53 та учрашувда майдонга тушиб, ўз ҳисобига 22 та гол ва 14 та голли узатма ёздириб қўйди.