«Сандерленд» ярим ҳимоячиси Гранит Жака «Челси» футболчисига айланмайди. Бу ҳақда журналист Жанлука Ди Марционинг сайти хабар берди.

Манбага кўра, швейцариялик футболчи «Челси» бош мураббийи Хаби Алонсога шахсан Лондон клубига ўтишдан воз кечиш ҳақида қарор қабул қилганини маълум қилган. 33 ёшли ярим ҳимоячи «Сандерленд»да қолиш ва жамоа сафида фаолиятини давом эттиришни маъқул кўрган.

Қайд этилишича, бу қарор «Челси» бош мураббийини хафа қилган. Чунки у тажрибали ярим ҳимоячи билан таркибни кучайтиришни режалаштирган эди.

Шу билан бирга, The Athletic нашрининг ёзишича, энг эҳтимолий сценарий Жаканинг «Сандерленд»да қолиши бўлиб турибди. Унинг клуб билан тузган шартномаси 2028 йилгача амал қилади.

Аввалроқ «Челси» футболчи учун 8 миллион фунт стерлинг таклиф қилгани ҳақида хабарлар тарқалганди. Бироқ «қора мушуклар» бу таклифни рад этган. Клуб раҳбарияти таклиф этилган суммани жуда паст деб баҳолаб, буни ҳам футболчига, ҳам «Сандерленд»га нисбатан ҳурматсизлик сифатида қабул қилган.

Гранит Жака ўтган ёзда «Байер»дан «Сандерленд»га кўчиб ўтган эди. У ўтган мавсумда 36 та учрашувда майдонга тушиб, 1 та гол ва 6 та голли узатмага муаллифлик қилди.