Юрген Клоппнинг Германия терма жамоасидаги мураббийлар штабига унинг Дортмунднинг «Боруссия» ва «Ливерпуль» клубларидаги собиқ ёрдамчиси Питер Кравиц, шунингдек, Пеп Лейндерс ҳамда «Бундестим»нинг собиқ устози Йоахим Лёв кириши мумкин.
Бундан ташқари, Германия футбол иттифоқи (DFB) Клопп шартнома асосида боғланиб қолган «Ред Булл» компанияси билан ҳам музокаралар олиб боришига тўғри келади. Мутахассиснинг тақдирини Ральф Рангник ҳал қилади. Клопп терма жамоа тарихида трансфери учун пул тўланиши керак бўлган илк бош мураббийга айланиши мумкин.
Таниқли журналист Патрик Бергернинг хабар беришича, DFB вакиллари аниқ ва мақсадли музокаралар ўтказиш учун ҳозирда Клопп бўлиб турган АҚШга учиб кетишга тайёр туришибди.
Эслатиб ўтамиз, Германия терма жамоаси ЖЧ–2026 мусобақасининг 1/16 финалида Парагвайга пенальтилар сериясида ютқазиб, турнирни тарк этган эди. Ушбу муваффақиятсизликдан сўнг Юлиан Нагельсманн жамоа бош мураббийлигидан кетди.
