Yurgen Kloppning Germaniya terma jamoasidagi murabbiylar shtabiga uning Dortmundning «Borussiya» va «Liverpul» klublaridagi sobiq yordamchisi Piter Kravis, shuningdek, Pep Leynders hamda «Bundestim»ning sobiq ustozi Yoaxim Lyov kirishi mumkin.
Bundan tashqari, Germaniya futbol ittifoqi (DFB) Klopp shartnoma asosida bog‘lanib qolgan «Red Bull» kompaniyasi bilan ham muzokaralar olib borishiga to‘g‘ri keladi. Mutaxassisning taqdirini Ralf Rangnik hal qiladi. Klopp terma jamoa tarixida transferi uchun pul to‘lanishi kerak bo‘lgan ilk bosh murabbiyga aylanishi mumkin.
Taniqli jurnalist Patrik Bergerning xabar berishicha, DFB vakillari aniq va maqsadli muzokaralar o‘tkazish uchun hozirda Klopp bo‘lib turgan AQSHga uchib ketishga tayyor turishibdi.
Eslatib o‘tamiz, Germaniya terma jamoasi JCH–2026 musobaqasining 1/16 finalida Paragvayga penaltilar seriyasida yutqazib, turnirni tark etgan edi. Ushbu muvaffaqiyatsizlikdan so‘ng Yulian Nagelsmann jamoa bosh murabbiyligidan ketdi.
