Лондоннинг «Челси» клубига тегишли бўлган аргентиналик вингер Алехандро Гарначо ҳамон «Наполи»нинг қизиқишлар доирасида бўлиб турибди. Бу ҳақда таниқли инсайдер Экрем Конур ўзининг ижтимоий тармоқлардаги саҳифалари орқали хабар бермоқда.

Журналистнинг берган маълумотларига кўра, «аристократлар» раҳбарияти футболчи билан хайрлашишга тайёр. Лондон клуби Алехандронинг сотувидан тахминан 46 миллион евро ишлаб олишни режалаштирмоқда. Бундан ташқари, Гарначога Аргентинанинг «Ривер Плейт» клуби ҳам қизиқиш билдирмоқда.

Эслатиб ўтамиз, ярим ҳимоячи ўтган йилнинг ёзида «Манчестер Юнайтед»дан «Челси»га кўчиб ўтган эди. Ўшанда у билан 2032 йилнинг июнь ойи охиригача мўлжалланган узоқ муддатли меҳнат шартномаси имзоланганди.

Якунланган мавсумда аргентиналик футболчи 39 та учрашувда майдонга тушиб, ўз ҳисобига 8 та гол ва 4 та голли узатма ёздириб қўйишга муваффақ бўлди.