«Ливерпуль»нинг собиқ ярим ҳимоячиси Тьяго Алькантара мураббийлар штаби аъзоси сифатида клубга қайтиш имкониятини кўриб чиқмаётганини маълум қилди. 2024 йилда футболчилик фаолиятини якунлаган испаниялик собиқ ўйинчи аввалроқ «Энфилд»га қайтиши мумкинлиги ҳақидаги миш-мишларда тез-тез тилга олинаётган эди.
«Йўқ, менда лицензиялар йўқ. Мураббийлик малакам ҳали етарли эмас», — дея таъкидлади Алькантара Рио Фердинанднинг подкастида.
Шу билан бирга, у ўқишни давом эттираётгани ва зарур ҳужжатларни олиш устида ишлаётганини қўшимча қилди:
«Ҳозир айни ўша мақсад сари йўлдаман».
Бу вақтда эса «Ливерпуль» рулида Арне Слотнинг ўрнини эгаллаган Андони Ираоланинг ёрдамчилари рўйхати шакллантириб бўлинди. Ўтган ҳафтада клуб бир нечта тайинловларни расман тасдиқлади. Улар қаторидан «Борнмут»дан келган Томми Элфик ва Шон Купер, шунингдек, ассистент Пабло де ла Торре ҳамда таҳлилчи Том Уэббер жой олган.
