«Манчестер Юнайтед» клуби жамоада янада баланслаштирилган маош тизимини жорий этиш устида ишлаётгани сабабли, ҳужумчи Маркус Рэшфорддан маошини камайтиришга розилик беришини талаб қилиши мумкин. Акс ҳолда, унинг жамоага қайтиши сўроқ остида қолади. Амалдаги шартномага кўра, англиялик футболчи ҳафтасига 325 минг фунт стерлинг (380 минг евро) маош олмоқда. Бу ҳақда Manchester Evening News нашрига таянган ҳолда Goal портали хабар берди.

Манбанинг берган маълумотларига кўра, «қизил иблислар» Рэшфорднинг маошини тушириш мақсадида у билан янги меҳнат шартномаси имзоланишига эҳтиёж сезишлари мумкин. Таъкидланишича, «Манчестер Юнайтед» раҳбарияти ҳужумчининг ҳозирги маошини сақлаб қолиш жамоа ичида келишмовчиликларга сабаб бўлишидан хавсирамоқда. Бу ҳолат бошқа футболчиларни ҳам ўз маошларини 28 ёшли вингер даражасигача кўтаришни талаб қилишга ундаши мумкин.

Рэшфорд «Манчестер Юнайтед» клуби тарбияланувчиси ҳисобланади. Футболчининг клуб билан амалдаги шартномаси 2028 йилнинг ёзига қадар мўлжалланган. Ортда қолган мавсумни у ижара асосида «Барселона» таркибида ўтказди.