«Ювентус» ва Аргентина терма жамоасининг собиқ ҳужумчиси Карлос Тевес Италия терма жамоаси атрофидаги вазият бўйича ўз фикрларини билдирди. «Скуадра Адзурра»нинг навбатдаги бор жаҳон чемпионатидан қуруқ қолганидан сўнг, жамоада бир қатор бўш иш ўринлари, жумладан, бош мураббийлик лавозими юзага келди.

«Италия техник директорлик лавозимига Мальдинини олиб келиши мумкинлиги ҳақидаги хабарларни кўрдим. Бу ролда у энг зўри — унинг «Милан»да қилган ишларига қарашнинг ўзи кифоя. У билан шахсан учрашганман, жуда оқилона фикрлайдиган инсон. Агар Конте ва Мальдини тандеми бирлаштирилса, ҳаммаси жойида бўлади», — дея Тевеснинг сўзларидан иқтибос келтиради Repubblica.

Шунингдек, Тевес терма жамоа устози бўлишга асосий номзод сифатида кўрилаётган Антонио Конте ҳақида алоҳида фикр билдирди:

«Сизларни бу вазиятдан фақат у олиб чиқа олади. У келган илк йилидаёқ натижа кўрсата оларди. Уни ҳеч қандай шубҳасиз қўллаб-қувватлаш керак. У мен бирга ишлаган энг яхши мураббийдир».

Тевес 2013/14 йилги мавсумда «Ювентус»да Конте қўл остида тўп сурган.