Мексика терма жамоаси мухлислари ЖЧ-2026 1/8 финалидан олдин Англия миллий жамоаси жойлашган меҳмонхона олдида тартибсизликлар келтириб чиқарди. Бу ҳақда TyC Sports хабар берди.
Мухлислар англиялик футболчиларнинг ухлашига халақит беришга уринган. Меҳмонхона олдига тўпланган ишқибозлар фейерверклар учирган, барабан ва карнайлар чалган ҳамда турли ҳайқириқлар билан жамоага босим ўтказишга ҳаракат қилган.
Ҳуқуқ-тартибот идоралари ходимлари мухлисларни меҳмонхона атрофидан узоқлаштириб, футболчиларнинг дам олиши учун чора кўрган. Бироқ мексикалик ишқибозлар анча узоқроқ масофадан туриб ҳам пиротехника воситаларидан фойдаланишда давом этган.
Гуруҳ босқичи якунларига кўра, Мексика терма жамоаси 9 очко билан A гуруҳида биринчи ўринни эгаллаган. Англия эса 7 очко тўплаб, L гуруҳида пешқадам бўлган.
1/16 финалда Мексика Эквадорни 2:0 ҳисобида мағлуб этган бўлса, Англия Конго ДР устидан 2:1 ҳисобида ғалаба қозонган.
Мексика — Англия ўртасидаги ЖЧ-2026 1/8 финал баҳси 6 июль куни Мехикодаги «Ацтека» стадионида бўлиб ўтади.
