«Милан»нинг португалиялик вингери Рафаэл Леау ёзги трансфер ойнасида жамоани тарк этиши мумкин.

La Gazzetta dello Sport нашрининг хабар беришича, айни дамда Леау учун курашда «Манчестер Юнайтед», «Тоттенхэм» ҳамда Саудия Арабистонининг бир нечта клублари иштирок этмоқда. Леау шу ёзнинг ўзидаёқ «Милан»дан кетиши кутиляпти. Италия клуби уни 60 миллион евро эвазига қўйиб юборишга тайёр.

Манбага кўра, аввалроқ футболчига «Барселона» ҳам қизиқиш билдирган эди, бироқ каталонияликлар «Ньюкасл»дан Энтони Гордонни сотиб олганларидан сўнг, Леау трансферидан воз кечишган.

Якунланган мавсумда Леау барча мусобақаларни инобатга олган ҳолда 31 та учрашувда майдонга тушди. Ушбу ўйинларда у 10 та гол урди ва 3 та голли узатмани амалга оширди.