«Milan»ning portugaliyalik vingeri Rafael Leau yozgi transfer oynasida jamoani tark etishi mumkin.

La Gazzetta dello Sport nashrining xabar berishicha, ayni damda Leau uchun kurashda «Manchester Yunayted», «Tottenxem» hamda Saudiya Arabistonining bir nechta klublari ishtirok etmoqda. Leau shu yozning o‘zidayoq «Milan»dan ketishi kutilyapti. Italiya klubi uni 60 million yevro evaziga qo‘yib yuborishga tayyor.

Manbaga ko‘ra, avvalroq futbolchiga «Barselona» ham qiziqish bildirgan edi, biroq kataloniyaliklar «Nyukasl»dan Entoni Gordonni sotib olganlaridan so‘ng, Leau transferidan voz kechishgan.

Yakunlangan mavsumda Leau barcha musobaqalarni inobatga olgan holda 31 ta uchrashuvda maydonga tushdi. Ushbu o‘yinlarda u 10 ta gol urdi va 3 ta golli uzatmani amalga oshirdi.