«Спортинг» сафида ҳужумкор ярим ҳимоячи позициясида тўп сурадиган Франсишку Тринкан фаолиятини Саудия Арабистонида давом эттириши мумкин. Нуфузли инсайдер Фабрицио Романонинг хабар беришича, футболчига «Ал-Аҳли» клуби жиддий қизиқиш билдирмоқда.

Саудия клуби «Спортинг» билан музокараларга киришган. Эҳтимолий трансфер суммаси тахминан 50 миллион еврони ташкил этади. Қайд этилишича, Тринканнинг ўзи ҳам Саудия Арабистони чемпионатининг бронза медали соҳиби билан шартнома имзолашга қарши эмас.

Бундан олдинроқ 26 ёшли ярим ҳимоячига «Милан» ва «Ливерпуль» клублари ҳам даъвогарлик қилаётгани ҳақида хабар берилган эди.

Якунланган мавсумда португалиялик футболчи барча турнирларда 54 та учрашувда майдонга тушиб, 13 та гол урди ва 18 та голли узатмани ўз ҳисобига ёздириб қўйди.