Ҳужумкор ярим ҳимоячи Антонио Вергаранинг «Наполи» билан шартномасини узайтириш эҳтимоли жуда юқори. Бу ҳақда инсайдер Николо Скира хабар бермоқда.

Манбанинг хабарига кўра, томонлар ўртасидаги музокаралар якуний босқичда турибди. Яқин кунларда 23 ёшли хавбек маоши сезиларли даражада оширилган ҳолда, 2034 йилгача мўлжалланган узоқ муддатли шартномага имзо чекиши кутилмоқда.

Таъкидланишича, бундан олдин «Наполи» Вергара бўйича тушган бир нечта таклифларни рад этган. Клублар италиялик футболчини тахминан 30 миллион евро эвазига сотиб олишга ҳаракат қилишган эди.

2025/26 йилги мавсумда Вергара барча турнирларда 19 та учрашувда иштирок этиб, 3 та гол урди ва 4 та голли узатмани ўз ҳисобига ёздириб қўйди.