Хорватия терма жамоаси бош мураббийи Златко Далич миллий жамоа жаҳон чемпионатидан чиқиб кетганидан сўнг ўз лавозимини тарк этганини эълон қилди. Хорватлар турнирдаги иштирокини 1/16 финал босқичида Португалия терма жамоасига 1:2 ҳисобида имкониятни бой бериб, якунлашди.
Хорватия футбол иттифоқи мураббий билан ҳамкорлик тўхтатилганини расман тасдиқлади.
«Камтарин бошланиш. Унутилмас йўл. Мағрур хайрлашув. Мураббий, ҳаммаси учун раҳмат — ғалабалар, муваффақиятлар, турнирларга чиқиш, медаллар, бирдамлик, ҳурмат ва Хорватия учун майдонда ҳам, майдон ташқарисида ҳам фидокорона курашганингиз учун. Натижалар сиз қандай мураббий бўлганингизни, ўйинчилар, ҳамкасблар ва рақибларнинг ҳурмати эса сиз қандай инсон эканлигингизни кўрсатиб турибди», — дейилади ташкилот баёнотида.
Далич Хорватия терма жамоасини 2017 йилда, жаҳон чемпионати саралаш цикли давомида Анте Чачичнинг ўрнига қабул қилиб олган эди. Унинг қўл остида миллий жамоа ўз тарихидаги энг катта муваффақиятларга эришди: 2018 йилги жаҳон чемпионатида кумуш медаллар, 2022 йилги жаҳон чемпионатида бронза медаллар ва 2022/23 йилги УЕФА Миллатлар лигасида иккинчи ўринни эгаллади.
