Мадриднинг «Реал» клуби ярим ҳимоячи Жуд Беллингем билан меҳнат шартномасини узайтиришни режалаштирмоқда. Бу ҳақда TEAMtalk хабар бермоқда.

Манбанинг маълумотига кўра, «қироллик клуби» ўйинчининг муваффақиятли мавсуми ва жаҳон чемпионатидаги ўйинидан сўнг унга янги узоқ муддатли шартнома таклиф қилмоқчи. Таъкидланишича, «Реал» Беллингемнинг йиллик маошини 18,2 миллион евродан 24,3 миллион еврогача оширишга тайёр. Бу инглиз футболчисини «Реал»нинг энг кўп маош олувчи ўйинчиларидан бирига айлантиради.

Ўтган мавсумда 23 ёшли Беллингем барча турнирларни инобатга олган ҳолда 40 та учрашувда майдонга тушиб, 8 та гол урган ва 5 та голли узатмани амалга оширган.

Ярим ҳимоячининг «Реал» билан амалдаги меҳнат шартномаси 2029 йилнинг ўрталарига қадар мўлжалланган.