Канадалик хонанда Жастин Бибер 2026 йилги Жаҳон чемпионати финал учрашувининг танаффус қисмида ташкил этиладиган шоу иштирокчиларидан бирига айланади, деб хабар бермоқда ФИФА матбуот хизмати.
Финал танаффусидаги шоу ФИФАнинг глобал таълим жамғармасини қўллаб-қувватлаш мақсадида ўтказилади. Ушбу ташаббус доирасида бутун дунё бўйлаб болаларнинг таълим ва футболга бўлган имкониятларини кенгайтириш учун 100 миллион доллар маблағ тўплаш кўзда тутилган. Жаҳон чемпионати ўйинларига сотилган ҳар бир чиптадан бир доллар ушбу жамғармага ўтказилади. Ҳозирги кунга қадар 50 миллион доллардан ортиқ маблағ тўпланган.
«Футбол бўйича Жаҳон чемпионати дунёни ҳеч нарса қила олмайдиган даражада бирлаштиради. Мен финал танаффусидаги шоунинг бир қисми бўлиш имкониятидан миннатдорман, чунки бу шоу аллақачон бутун дунё бўйлаб болалар учун таълим олиш имкониятларини кенгайтиришга ёрдам бераётганини биламан», — дея Бибернинг сўзларини келтиради ФИФА расмий сайти.
Аввалроқ, шоуда америкалик хонанда Мадонна, колумбиялик ижрочи Шакира ва Жанубий Кореянинг «BTS» гуруҳи ҳам чиқиш қилиши эълон қилинган эди.
Жаҳон чемпионати АҚШ, Канада ва Мексикада ўтказилмоқда. Турнир 19 июль куни Ист-Ратерфорддаги (Нью-Жерси штати, АҚШ) «Метлайф» стадионида бўлиб ўтадиган финал учрашуви билан якунланади.
