Дортмунднинг «Боруссия» клуби 24 ёшли вингери Карим Адейеми фаолиятини «Барселона»да давом эттириши мумкин. Бу ҳақда инсайдер Николо Скира хабар бермоқда.

Манбанинг маълумотларига кўра, «Барселона» футболчи билан 2031 йилгача мўлжалланган шахсий шартнома шартларини келишиб олган. Айни дамда каталонияликлар «Боруссия» билан музокаралар олиб бормоқда.

Адейемига «Барселона»дан ташқари Англия Премьер-лигасидан ҳам бир қанча таклифлар бўлган, бироқ у айнан «кўк-анорранглилар» лагерига кўчиб ўтишни истамоқда.

Якунланган мавсумда Адейеми барча мусобақаларда 39 та учрашувда майдонга тушиб, 10 та гол урди ва 6 та голли узатма муаллифига айланди.