2026 йилги жаҳон чемпионатининг Норвегия ва Англия ўртасидаги чорак финал ўйини қолдирилиш хавфи остида турибди.
Бу мундиалда яна бир бор об-ҳаво ўз шартларини ўтказмоқда. The Sun хабарига кўра, Майамидаги об-ҳаво шароити ўйинга жиддий таъсир кўрсатиши мумкин.
Прогнозларга кўра, ўйин куни ҳарорат +44°C гача иссиқ бўлиши кутилмоқда. ФИФА қоидаларига кўра, агар ҳақиқий ҳарорат +32°C дан ошса, ҳар бир бўлимда уч дақиқалик мажбурий сув ичиш танаффуслари эълон қилиниши керак. Бундан ташқари, қаттиқ иссиқ бўлган тақдирда ФИФА ўйинни қолдириш ёки бекор қилиш ҳуқуқини ўзида сақлаб қолади.
Яна бир жиддий муаммо — момақалдироқ хавфи. Қоидаларга кўра, агар стадиондан 13 километр радиусда чақмоқ чақиши аниқланса, баҳс ўйинчилар, ҳакамлар ва мухлислар хавфсизлигини таъминлаш учун камида 30 дақиқага тўхтатилиши шарт.
Шундай қилиб, об-ҳаво энг кўп кутилаётган чорак финал ўйинларидан бирига жиддий таъсир кўрсатиши мумкин.
