«Ньюкасл» ва «Фрайбург» ярим ҳимоячи Йохан Манзамбининг трансфери бўйича тўлиқ келишувга эришдилар. Трансфер суммаси 60 миллион еврони ташкил этди, деб хабар бермоқда Флориан Плеттенберг ўзининг X ижтимоий тармоғидаги саҳифасида.
Клублар келишувнинг барча шартларини тўлиқ ҳал қилиб бўлишган. Айни пайтда «Ньюкасл» раҳбарияти футболчининг ўзи билан шартноманинг сўнгги деталларини якунламоқда. Унинг учун аллақачон узоқ муддатли шартнома тайёрлаб қўйилган.
Швейцариялик футболчига Амаду Онананинг хочсимон бойламлари узилганидан кейин ярим ҳимоя чизиғини кучайтиришни мақсад қилган «Астон Вилла» ҳам қизиқиш билдираётган эди, бироқ «Ньюкасл» курашда фаворитга айланди. Якунланган 2025/2026 йилги мавсумда Манзамби барча турнирларда 47 та ўйинда иштирок этиб, 7 та гол урди ва 9 та голли узатмани амалга оширди.
