Calciomercato нашрининг La Gazzetta dello Sport'га таяниб хабар беришича, «Ювентус» Фикайо Томорини ўз сафига қўшиб олишга яна бир бор уриниб кўрмоқчи.

Аввалги трансфер уриниши барбод бўлганидан бир ярим йил ўтиб, туринликлар «Милан» марказий ҳимоячисини яна кўриб чиқмоқдалар. У А Серияда катта тажрибага эга ўйинчи сифатида баҳоланмоқда, бу эса бош мураббий Лучано Спаллеттининг талабларига мос келади.

Бироқ битим туринликларнинг сотувларига боғлиқ бўлади. Раҳбарият учун трансфер бозорига чиқишдан олдин таркибни оптималлаштириш устувор вазифа ҳисобланади. Кетиши мумкин бўлган номзодлар орасида катта фойда келтириши кутилаётган Федерико Гатти бор.

Гатти кетган тақдирда, «Ювентус» Томорини сотиб олишга ҳаракат қилишга тайёр. Марио Хила келганидан сўнг ўйин вақти камайиши кутилаётган 28 ёшли футболчи ўтиш имкониятини кўриб чиқиши мумкин. Инглиз футболчисининг «Милан» билан шартномаси 2027 йилда ўз ниҳоясига етади.

Томори 2021 йилдан буён миланликлар сафида тўп суриб келмоқда ва шу вақт ичида 214 та ўйинда иштирок этиб, 7 та гол урган.