Лиссабоннинг «Спортинг» клуби вингери Франсишку Тринкан «Ал-Аҳли»га ўтади.

Таниқли инсайдер Фабрицио Романонинг эксклюзив хабарига кўра, Саудия клуби португалиялик футболчини 45 миллион доллар ҳамда 5 миллион бонус (39,4 млн + 4,4 млн евро) эвазига ўз сафига қўшиб олиш бўйича келишувга эришган. Фақатгина ҳужжатларни расмийлаштириш қолди, шундан сўнг трансфер расман эълон қилинади. Жидда шаҳри жамоасида 26 ёшли футболчи яқинда жамоани тарк этган Риёд Маҳрезнинг ўрнини эгаллайди.

Франсишку Тринкан 2022 йилнинг ёзидан буён «Спортинг» шарафини ҳимоя қилиб келаётган эди, ундан аввал эса «Барселона», «Вулверхэмптон» ва «Брага» клубларида тўп сурган. Португалия терма жамоаси сафида ўйинчи 19 та учрашувда иштирок этиб, ўз ҳисобига учта гол ва битта голли узатмани ёздириб қўйган.