29 ёшли франциялик қанот ҳужумчиси Аллан Сен-Максимен Американинг «Шарлотт» клуби билан шартнома имзолади. Бу ҳақда МЛС вакили бўлган жамоа матбуот хизмати расмий сайтида маълум қилди.
Вингер Шимолий Каролина клуби сафига эркин агент мақомида келиб қўшилди ва уч йиллик меҳнат шартномасини имзолади.
Франциянинг «Сент-Этьен» тарбияланувчиси бўлган футболчи «Монако», «Ницца», «Ньюкасл», «Фенербахче», «Ганновер» ва бошқа клублардаги ўйинлари орқали танилган. 2026 йилнинг февралидан буён Сен-Максимен «Ланс» шарафини ҳимоя қилиб келаётганди. У мазкур жамоа таркибида барча турнирларда 13 та ўйинда майдонга тушиб, тўртта гол урган ва учта голли узатмани амалга оширган.
