Суперлига регламентининг 11.4-бандига кўра, клублар ёзги трансфер ойнасида беш нафар футболчи ва бир нафар дарвозабонни рўйхатдан ўтказиши мумкин эди. Бироқ бугунга келиб, профессионал клублар Президентнинг 2026 йил 24 мартдаги "Спорт соҳасини молиялаштириш механизмларини такомиллаштириш ва соҳага тадбиркорлик субъектларини жалб қилишни кенгайтириш чора-тадбирлари тўғрисида"ги 107-сонли қарори асосида молиялаштирилмоқда.
Айни вақтда маҳаллий ва чет эллик футболчилар ҳамда ходимларнинг иш ҳақини мутаносиб миқдорда тўлашни кўзда тутувчи норматив-ҳуқуқий ҳужжат лойиҳаси ва Спорт соҳасида ташаббусларни қўллаб-қувватлаш жамғармаси тартиби ишлаб чиқилмоқда. Ушбу ҳужжатлар тасдиқлангунга қадар, клубларда футболчиларнинг маошларини тўлашда қийинчиликлар кўзга ташланмоқда.
Қишки трансфер ойнаси 20 февралда ёпилган бўлиб, айрим клублар йиллик харажатлар сметаси тўлиқ тасдиқланмасдан туриб, юқори ҳақ олувчи ўйинчилар билан шартнома тузган эди. Эндиликда клублар харажатларни оптималлаштириш учун баъзи футболчилар билан шартномаларни муддатидан аввал бекор қилмоқда. Бу эса уларнинг ёзги трансфер режаларига ўзгартириш киритишни тақозо этди.
Лига мавжуд муаммоларнинг салбий оқибатларини юмшатиш мақсадида, июнь ойида регламентнинг 11.4-бандини вақтинчалик енгиллаштириш масаласини кун тартибига қўйди ва клублар таклифини ўрганди. Чекловни 2026 йилнинг иккинчи ярми учун 10 нафар футболчи ва 2 нафар дарвозабон кўринишида ўзгартириш муҳокама қилинди.
"Бунёдкор", "ОКМК" ва "Локомотив"дан ташқари, Суперлиганинг 12 та клуби ушбу таклифни ёқлаб овоз берди. "Андижон" клуби эса сўровни жавобсиз қолдирди. Шундан келиб чиқиб, Лига ёзги трансфер ойнаси учун чекловни 10 нафар футболчи ва 2 нафар дарвозабон кўринишида кенгайтиришга рухсат беришни мақсадга мувофиқ деб топди.
