Англия терма жамоаси ҳужумчиси Харри Кейн Жуд Беллингемнинг бош мураббий Томас Тухель эътирозларига берган жавобини изоҳлади.
«Уч шерлар» устози ЖЧ-2026 чорак финалида Норвегия устидан қозонилган ғалабадан (2:1) сўнг жамоа кўрсатган ўйиндан у қадар қониқмаганини билдирган эди. Мадриднинг «Реал» клуби ярим ҳимоячиси эса мураббий ўйинчилар майдонда қандай қийинчиликларга дуч келганини тасаввур ҳам қила олмаслигини ишора қилганди.
«Шундай чарчоқли ўйиндан чиққанингдан сўнг, финал ҳуштагидан беш дақиқа ўтиб сенга бундай савол беришса, қандай жавоб бўлиши мумкин? Жуд нима дейиши керак эди? Биз айнан шундай ноқулай шароитларда ўйин ўтказдик. Бундай вазиятларни провокация қилиш жуда осон – бу инглиз менталитетининг бир қисми. Аммо ҳақиқатда ҳаммаси мутлақо бошқача – бизда жуда иноқ жамоа бор. Бу фақат ўйинчиларга эмас, балки мураббий ва ходимларга ҳам тегишли. Айнан шунинг учун биз бу қадар узоққа етиб келдик. Бундай вазиятларни йўқ жойдан кўпиртириб юборишлари ачинарли», — деди Кейн журналистлар билан суҳбатда.
15 июль куни Англия терма жамоаси Жаҳон чемпионати ярим финалида Аргентинага қарши майдонга тушади.
